“Alija Perënija”

Ali Mema do të mbushte sot 80 vjeç…

Sipas gazetarit të mirënjohur Bedri Alimehmeti, Ali Mema është “më i madhi i futbollit bardheblu dhe ndër më të mëdhenjtë e Shqipnisë”.

Ali Mema (1 SHKURT 1943 - 26 mars 2019) ishte ylli më i shndritshëm i ekipit të madh të Myslym Allës në vitet '60… Bashkëlojtar i talenteve si Halili, Frashëri, O. Mema, Bytyçi, Bukoviku, Hyka, Kazanxhi, Kasmi, Xhaçka, Dhales, Nurishmi, Ishka, A. Çela etj.

Lojtari më universal i futbollit shqiptar… Mbrojtës i djathtë i qendrës, stoper, mesfushë, sulm, kudo. Por edhe portier. Ai ka pritur 3 penallti në finalen e paharruar me Besën në prill të vitit 1963 (finalja e Kupës së Republikës), 3-2 për Besën në Tiranë dhe pas një jave 1-0 për 17 Nëntorin në Kavajë.

Ali Mema pas dëmtimeve të portierëve Metani dhe Beliu, “zbaton” urdhërin e Myslym Allës për të ruajtur portën në serinë e 5 penalltive…

Dhe pret tre penallti të gjuajtur nga Bit Rexha duke ndihmuar skuadrën kryeqytetase të fitonte trofeun e parë të pasluftës...

Kam qenë ne Angli në shkurt 1993, kur është varrosur legjenda e futbollit anglez Bobby Moore.

Një nga gazetat qendrore britanike shkruajti: "Nuk shoqëruam në banesën e fundit një futbollist…, por futbollistin."

Ishte një sentencë lakonike për të treguar klasin si futbollist dhe si qytetar të Bobby Moore.

I tillë mbetet edhe perceptimi i publikut shqiptar për kampionin e madh Ali Mema, të cilin do të doja ta krahasoja me xhentilesën e kampionit të madh Anglez.

Për koincidencë edhe Moore edhe Mema kanë mbajtur numrin 6…

Ali Mema do të mbetet në historinë e futbollit shqiptar një aristokrat, si në fushën e lojës ashtu dhe jashtë saj. Një nga yjet e shndritshem të futbollit shqiptar.

Luajti në një kohë kur nuk fitoi asgjë materiale. Luajti me ndershmëri dhe talent për gëzimin tonë në kohë të vështira dhe mbeti një nga idhujt tanë..., që kurrë nuk do të harrohet.

Trofe të fituar:

Kampionate: 4 me SK Tirana (17 Nëntori) në sezonet 1964-1965, 1965-1966, 1968 dhe 1969-1970.

Kupa të Shqipërisë: 1 me SK Tirana (17 Nëntori) 1963.

Kampionate si zv-trajner: 3 me SK Tirana (17 Nëntori) 1981-1982, 1984-1985, 1996-1997

Mjeshtri i madh Ali Mema ka luajtur me ekipin Kombëtar 12 ndeshje në vitet 1963-1967. (Këtu nuk përfshihen dy ndeshje me ekipin olimpik shqiptar, të luajtura kundër ekipit olimpik bullgar)

Për herë të parë me përfaqesuesen Mema ka luajtur kundër Danimarkës me 30 tetor 1963 (1-0) dhe të fundit kundër RFGJ në 17 dhjetor 1967 (0-0).

Takime ndërkombëtare miqësore dhe zyrtare për Kupën e Kampioneve dhe Kupën Ballkanike midis klubeve: 80.

I dha fund futbollit të luajtur në vitin 1972, kur ishte vetem 29 vjeç…

Mban titujt: “Mjeshtër i Madh”, “Mjeshtër Sporti”, “Mjeshtër i Merituar”, “Nderi Sportit Shqiptar”, “Legjenda e Futbollit Shqiptar”, “Mirënjohje e Qytetit të Tiranës”, në “Librin e Artë” të Klubit të Futbollit “Tirana”.

Saimir. Z. Kadiu