Curri i Fushë-Arrëzit i jep mikut të tij 84 milionë lekë për tolona nafte, tenderi me “Flamur të kuq”

Kryetari i Bashkisë Fushë-Arrëz, Hil Curri i jep kontratën 84 milionë lekë mikut të tij që t’i furnizojë makinën me naftë. Sipas dokumenteve të tenderit, makinat e bashkisë së Fushë -Arrëzit do të konsumojnë 48579 litra naftë. Po pse kjo shifër dhe jo më pak?

Kryetari nuk e shpjegon se si e ka vendosur fondin limit, por mund të jetë nisur nga rritja e çmimit të karburanteve në bursat ndërkombëtare apo nga harxhimi gjatë vitit të kaluar. Me kaq naftë përshkruhet mesatarisht 700 mijë kilometra! Sikur kryetari të kursente pak naftë, të bënte më pak kilometra me makinat e tij bashkë me stafin, ndoshta do të tepronin 10, 20 apo 30 milionë lekë.

Po sikur të bëhej një tender pa shkelje të ligjit mbi prokurimin? Nuk e dimë se sa lekë do të kurseheshin, nëse do të kishte konkurrencë duke marrë pjesë disa kompani që paraqesin ofertat e tyre, ku fiton propozimi më ekonomik.

Konkretisht, më datë  25 mars 2024, kryetar Curri ka hapur tenderin me objekt “Blerje karburant për mjetet motorikë te Bashkisë”.

Bashkia do të blejë 84 milionë lekë naftë (pa TVSH) për të furnizuar makinat e saj, përfshirë mjetin e kryetarit.

“Gara” për këtë tender kishte afat deri më 8 prill 2024, por ishte paraqitur vetëm një ofertë, ajo e firmës “Vellezerit Tuci-OIL” SHPK, në pronësi të Mark Tucit. Tenderi duhej anuluar dhe të priteshin oferta të tjera, që të kishte konkurrencë. Por kontrata i është dhënë firmës me shpejtësi sikur të kishte urgjencë.

Open Data Albania e ka vlerësuar tenderin me ‘Flamur të Kuq’, që është shenja e riskut të korrupsionit.

Për më tepër, ekziston rreziku që kontrata të mos përmbushet sipas kushteve, sepse kompania fituese nuk është qëndrueshme nga pikëpamja financiare.

Sipas grafikut të mëposhtëm, deri në vitin 2020, “Vëllezërit Tuci- Oil” shpk ka rezultuar me humbje.

Konkretisht nga viti 2017 deri në vitin 2019 ka patur vetëm humbje, në vitin 2020 regjistron një fitim 845 mijë lekë. Nga ana tjetër tenderi duket që është përgatitur në përshtatje me kërkesat që plotëson kompania lokale. Kështu, dokumentet standarde kërkojnë furnizimin e mjeteve me tolona, ndërsa në të gjithë vendin institucionet furnizohen aktualisht me karta elektronike.

Urojmë që kryetari i Fushë Arrëzit të mos vazhdojë në rrugën e paraardhësit të tij, Fran Tuci që u arrestua nga SPAK për shpërdorimin e detyrës.