Elbasan/ Drejtori i landafillit, Leli Kaja, “urithi” që ka bërë kërdinë me letra false

Kur e thirri prokurori, ai nuk ia çoi dosjet e aktivitetit financiar, ndërsa kur prokurori shkoi te zyrat e landfillit nuk i gjeti dosjet...

Me heqjen e landfillit të Elbasanit nga kthetrat e Klodian Zotos e Mirel Mërtirit në nëntor 2021, dhe kalimin në pronësi të 7 bashkive të qarkut, u mendua se kjo kompani shpëtoi nga vjedhjet dhe do vihej në punë inceneratori i djegies së mbetjeve e prodhimit të energjisë elektrike.

Por në vend të tyre, fillimisht u caktua administratore Arjola Mehmetaj, të cilën e hoqën pas 1 viti, me urdhër të klanit mafioz qeveritar e bandave të Elbasanit, ngaqë nuk ishte esnafe, për të fshehur vjedhjet që ishin bërë e për të vazhduar vjedhjet me letra fiktive.

Më 20 tetor 2022, me urdhër të Gledian Llatjas si Kryetar i Bashkisë së Elbasanit që ka 52% të aksioneve në landfill, dhe me dakordësinë e 6 kryebashkiakëve të Librazhdit, Gramshit, Peqinit, Cërrikut, Prrenjasit e Belshit, administrator u emërua Leli Kaja, i njohur si “urithi” i vjedhjeve.

Para ca ditësh, administratori Leli Kaja dhe 3 zyrtarë të “Eco-Elb” u shoqëruan në polici me urdhër të prokurorit Xhelian Seferi, si persona nën hetim për shpërdorim detyre, me objekt zjarr-vënie të qëllimshme mbetjeve, për të fshehur mashtrimin që inceneratori nuk punon e për korrupsion.

Administratori Leli Kaja, gjatë 2 viteve e gjysmë në krye të landfillit të Elbasanit, ka bërë raporte false sikur inceneratori është në gjendje pune, për të justifikuar vazhdimin e vjedhjes së milionave tenderë fiktivë për gjoja sistemimin e mbetjeve, për vënien në funksionim të inceneratorit, për testimet teknolgjike, mirëmbajtjen e tij dhe matjen e ndikimit në mjedis.

Pasi e kanë marrë në pronësi landfillin, Bashkia e Elbasanit dhe 6 bashkitë; Librazhd, Gramsh, Peqin, Cërrik, Prrenjas e Belsh, kanë paguar 8 milionë Euro për depozitimin dhe djegien e mbetjeve, paçka se inceneratori nuk punon dhe mbetjeve u vihet zjarri në shesh-grumbullim, por rezulton se janë vjedhur afro 5 milionë Euro për gjoja kapsulimin e tyre.  

Sipas hetimit paraprak, rezulton se administratori Leli Kaja, ka bërë letra shpenzimesh false edhe për paga fiktive punëtorësh tepër që nuk janë në Shqipëri.

Ka bërë tenderë fiktivë për gjoja ekspertë, karburante, pjesë këmbimi inceneratori, veshje pune e  buldozerë me qira, të cilat ia ka miratuar bordi që përbëhet nga drejtorë të 7 bashkive.

Kur Leli Kajën e thirri prokurori i çështjes, ai nuk ia çoi dosjet e aktivitetit financiar të shoqërisë “Eco-Elb Sh.A”, ndërsa kur prokurori shkoi te zyrat e landfillit, nuk gjeti atje as administratorin dhe as dosjet e aktivitetit ekonomiko-financiar, deri sa prokuroria i gjeti dhe i sekuestroi.

Por Leli Kaja, ka 3 dosje të tjera penale në Prokurinë e Elbasanit, për mashtrime, falsifikime, grabitje tokash e trojesh, ndërtime pa leje për të fortët e për vete, mbi troje publike të zaptuara me letra false gjatë viteve 2007-2021, kur ishte Drejtues i Inspektoratit të Mbrojtjes së Territorit në Bashkinë e Elbasanit, dosje penale që i janë lënë në heshtje.

Po hetohet fakti, që me pagën si administrator dhe pagën e bashkëshortes Nada Kaja (Teta) në Degën e Sigurimeve Shoqërore Elbasan, “urithi” Leli Kaja ka deklaruar 5 shtëpi, 2 njësi tregtare, makina të shtrenjta e disa llogari bankare, por ka dhe pasuri të fshehura në emër të familjarëve të tij.

Në muajin janar 2020, ka marrë kredi bankare 51 mijë Euro, të cilën do ta shlyej për 6 vite me kest mujor 1000 Euro, si dhe ka Bar-Kafe-Restorant “Xhesi” me sipërfaqe 500 m2 në distancë 100 metër larg Drejtorisë së Policisë Elbasan, pasuri që i ka vënë në vitet kur ishte Drejtues i Inspektoratit të Mbrojtjes së Territorit në Bashkinë e Elbasanit.

Ky drejtues, përveç hetimit që po i bëhet për vjedhjet në landfill, ka 2 procedime të tjera penale për vjedhjet nëpërmjet tenderëve dhe nga falsifikimi i të ardhurave të faturave të ujit, kur ishte Drejtor i Ujësjëllësit të Elbasanit në periudhën shkurt 2021- tetor 2022 etj. etj