Gjermania nuk ndryshon qëndrim: Kërkesa e Serbisë për dërgimin e trupave në Kosovë.

Serbia i është drejtuar ditë më parë zyrtarisht NATO-s me kërkesë për vendosjen e një mijë trupave në Kosovë, me pretekstin se populli serb që jeton në veri “ka nevojë për mbrojtje”. Nga KFOR-i dje kanë thënë se ende janë duke e shqyrtuar kërkesën.

Ndërkohë, shefja e diplomacisë gjermane Annalena Baerbock, është shprehur qysh në dhjetor se një kërkesë e tillë e Serbisë për dërgimin e forcave ushtarake në Kosovës është krejtësisht e papranueshme.

“Siç ka deklaruar publikisht Ministrja e Jashtme Baerbock në Twitter më 11 dhjetor 2022: “Propozimi për dërgimin e forcave serbe në Kosovë është plotësisht i papranueshëm…”, kanë thënë nga Ambasada e Gjermanisë në Prishtinë.

Më tej, Ambasada gjermane në Prishtinë thekson se qëndrimi i Berlinit zyrtar është se e vetmja rrugë për të shmangur tensionet dhe për të normalizuar përfundimisht raportet në mes të Kosovës dhe Serbisë është dialogu.

“Vazhdimi i dialogut është e vetmja rrugë për të shmangur tensionet dhe për të normalizuar përfundimisht marrëdhëniet në mes Kosovës dhe Serbisë. Ai gjithashtu është një parakusht për anëtarësimin e tyre të ardhshëm në BE. Prandaj Gjermania i mbështet plotësisht të gjitha përpjekjet e Përfaqësuesit Special të BE-së Lajcak në lehtësimin e mëtejmë të dialogut”, përfundon përgjigja