Heqja e barrikadave në veri, reagon Albin Kurti: Ata që i vendosën u lodhën dhe po i heqin

Kryministri i Kosovës Albin Kurti ka reaguar pasi serbët kanë filluar të heqin barrikadat në veri.

Kurti tha se serbët vetë i vendosën barrikadat dhe vetë i hoqën pasi janë lodhur duke bllokuar veten.

“Barrikadat po hiqen, të dielen e thamë që është çështje ditësh se kur do të largohen, edhe më mirë që kjo do të bëhet pa ndërhyrjen e Policisë tonë. Vet i vunë barrikadat, vet i hoqën ato, me fjalë tjera janë lodhur ata të cilët e bllokuan veten”, u shpreh Kurti.

Kujtojmë se, këto barrikada u vendosën në Veri pas arrestimit të ish-policit serb, Dejan Pantiq, të cilit dje iu ndryshua masa e sigurisë nga paraburgim në arrest shtëpiak.

Menjëherë në mbrëmje autoritetet serbe njoftuan se do të hiqeshin barrikadat, dhe sot disa prej tyre janë larguar.