Hiqet taksa TVSH për bletët e lopët barsë, nuk hiqet TVSH e ushqimeve, ilaçeve, energjisë e ujit

Çmimet me TVSH janë 20% më të larta; ndërsa deputetët, për produktet, mallrat e makinat luksoze që importojnë, nuk paguajnë as TVSH e as taksë doganore, ndërkohë që pagat i kanë 3.2 milionë lekë dhe marrin nga 1.8 milionë lekë shpërblime në muaj mbi pagën, për trajtim ushqimor, karburant, telefon, qira banese, hotel e dieta... 

Në mbledhjen e Komisionit Parlamentar të Ekonomi-Financave për paketën fiskale të vitit 2024 lidhur me taksat publike, u vendos të hiqet TVSH-ja dhe pagesa e garancisë doganore për kosheret e bletëve në sera dhe për lopët që janë barsë në momentin e zhdoganimit.Meqë mbledhja e komisionit u zhvillua me dyer të mbyllura dhe vetëm me deputetët e PS, këtë lajm e bëri publik në “FB” deputeti Erjon Braçe, i cili quajti “premtim të mbajtur të qeverisë dhe mbështetje historike për fermerët”.

Në fakt, gjatë fushatës elektorale të 2013-ës para ardhjes në pushtet, Edi Rama dhe deputetët e PS në çdo zonë, dolën me këtë premtim: Vendimi i parë i qeverisë socialiste, do jetë heqja e taksës 20% TVSH për çmimet e ushqimeve, ilaçeve, pesticideve, prodhimeve bujqësore, karburanteve, energjisë e ujit të pijshëm.

Madje në videot gjatë takimeve elektorale në Lushnjë dhe fshatrat e këtij rrethi, deputeti Erjon Braçe, thotë: - Vota për PS do zhduk taksën mafioze TVSH, duke i dhënë fund vjedhjes 20% shtesë që qeveria i bënë popullit te buka, mielli, qumështi, vaji, ilaçet e çdo gjë.

Pas heqjes së TVSH për jahtet, hotelet e resortet, qeveria vendosi të heq TVSH-në për kosheret e bletëve që mbahen në sera dhe për lopët e mëshqerrat e racës, të cilat do jenë barsë në momentin e zhdoganimit dhe hyrjes në Shqipëri.

Po nuk heq taksën 20% për ushqimet, ilaçet, pesticidet, prodhimet bujqësore, karburantet, energjinë elektrike, ujin e pijshëm; madje as për bukën masive, që “de facto” rrit çmimet tyre me 20% vlerë shtesë, vlerë që rritet pas çdo rritje çmimi në treg.

P.sh, nëse buka në treg është 1000 lekë, me taksën TVSH bëhet 1200 lekë. Nëse çmimi i energjisë është 95 lekë/kë, në faturë paguhet 114 lekë/kë.

Nëse uji në Tiranë është 66 lekë/m3, në faturë paguhet 78 lekë/m3; madje të vjedhin edhe duke llogaritur me 20% TVSH taksën e televizorit, pastrimit, banesës, biznesit e taksës arsimore.

Sipas deklarimeve të ministrisë së Financave, vetëm nga taksa 20% TVSH nga konsumatori fundor që është populli, qeveria mbledh 600-700 milionë Euro në vit; që është vjedhje, mbas konsumatorit nuk i rikthehet kjo vlerë financiare me trajtë rimbursimi, siç u rikthehet bizneseve.

Pra, çmimet me taksën TVSH, janë 20% më të larta, që do të thotë 20% më pak fuqi blerëse e pagave e pensioneve, pa llogaritur rritjen e çmimeve dhe shtimin e taksave, ndërsa pensionet indeksohen çdo 2 vite në masën 2-3%.

Ndryshe veprohet me deputetët, të cilët për produktet, mallrat e makinat që importojnë, nuk paguajnë TVSH e taksë doganore, ndërkohë që pagat i kanë 3.2 milionë lekë dhe marrin nga 1.8 milionë lekë shtesë në muaj, për trajtim ushqimor, karburant, telefon, hotel e dieta