“Ju dhamë 2 mln USD”/ Trump përmend për herë të parë Kosovën, ‘Bild’ njofton largimin e trupave amerikane nga KFOR

Cili do të jetë ndikimi i Trump në Kosovë?

Presidenti amerikan, Donald Trump ka përmendur për herë të parë Kosovën. Është folur shpesh mbi ndikimin që do të ketë ai aty, duke qenë se Grenell e ka sulmuar fort Kurtin. Sot duke folur mbi fondet që ka dhënë SHBA ai tha se në Kosovë kanë shkuar 2 mln dollarë. Ai tha se këto para janë dedikuar për zhvillimin e “modeleve të qendrueshme të riciklimit” që synojnë “rritje të kohezionit socio-ekonomik” në vend.

“2 milionë dollarë për zhvillimin e modeleve të qendrueshme të riciklimit për të rritur kohezionin socio-ekonomik në mesin e komuniteteve të margjinalizuara në Kosovë, si romët, ashkalitët dhe egjiptianët”, tha Donald Trump.

Gjatë fjalës së tij, Trump përmendi edhe Serbinë, e cila ka marrë 14 milionë dollarë për përmirësimin e prokurimeve publike. Lista e gjatë e Donald Trump përfshinte një numër vendesh të cilat kanë përfituar para nga Shtetet e Bashkuara të Amerikës. Me marrjen e detyrës, Presidenti Trump urdhëroi një pauzë 90-ditore të ndihmës për zhvillimin e huaj, duke bërë thirrje për verifikimin e efektivitetit dhe konsistencës së saj me politikën e jashtme.

Ndërkohë sot mediat gjermane kanë raportuar se SHBA mund të tërheqë trupat e saj nga Kosova. "Bild" sot ka raportuar se Italia është duke u përgatitur për tërheqjen e mundshme të trupave amerikane nga KFOR-i. Sipas gazetës së njohur gjermane, ky raportim mbështetet në informacionet që ka.

“Sipas të dhënave të "Bild"-it, Italia është duke u përgatitur për tërheqje të mundshme të trupave të SHBA-së nga Kosova. Aleatët evropianë atëherë do të ishin të vetëm në Ballkan kundër mikut të Putinit, Aleksandar Vuçiç, dhe ushtrisë së tij të fuqishme serbe”, thuhet në këtë artikullin e sotëm të publikuar.

Më tej thuhet se ka një shqetësim të madh në shumë pjesë të Evropës për negociatat amerikano-ruse.

“Presidenti amerikan, Donald Trump, e ka përjashtuar një tërheqje të plotë të trupave amerikane nga Evropa. Sipas të dhënave të "Bild"-it, shërbimet perëndimore të sigurisë dhe politikanët perëndimorë kanë frikë se bisedimet që nisën në Riad do të mund të çonin në përfundimin e pranisë së trupave amerikane në pjesë të mëdha të Evropës”, theksohet më tej.

Ndërkohë ka pasur një reagim nga KFOR-i. Sipas saj, zyrtarët amerikanë e kanë bërë të qartë angazhimin e tyre ndaj Aleancës Veri-Atlantike.

“Zyrtarët amerikanë e kanë bërë të qartë angazhimin e tyre ndaj Aleancës (Veri-Atlantike), përfshirë praninë e SHBA-së në Evropë dhe se parandalimi dhe mbrojtja e NATO-s duhet të mbeten të fuqishme. Si pjesë e kësaj, SHBA ka bërë të qartë gjithashtu pritjet e saj që aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë sonë të përbashkët. NATO po përshtatet vazhdimisht me një mjedis në ndryshim. Kjo është pjesë e asaj që duhet për të qendruar gati”, thuhet në përgjigjen e tyre.