Me Sulejman Demollarin, yllin tonë të futbollit

Saimir Z. KADIU

____

Një kafe pas shumë vitesh me shokun tim të fëmijërisë Sulejman Demollarin... "

El Platini del proletariado" siç do ta konsideronte një revistë sportive spanjolle...

Me fat që e kemi ndjekur "live" yllin e shndritshëm të futbollit shqiptar...

Talenti i tij i jashtëzakonshëm, vizioni i lojës, teknika e rafinuar dhe shënimi i golave e bëjnë Demollarin lojtarin më të madh shqiptar të viteve '80 - '90.

Ndoshta mund të jetë edhe më i madhi i të gjitha kohërave... Por kjo e fundit është pak e vështirë të pranohet nga tifozëria kryeqytetase e Partizanit apo e Tironës për një lojtar të Dinamos…

Po të ishte lojtar i Tironës..., patjetër do të kishte monument në qendër të Tiranës...

E kam ndjekur talentin e tij të dukshëm që kur ishim fëmijë, kur luante me klasat sportive.

Kemi qenë më pas shokë në gjimnazin "Qemal Stafa" në Tiranë. Kam pasur fatin që edhe kam luajtur si amator me Demollarin në vitet e gjimnazit.

Një njeri model, shumë i thjeshtë dhe shumë modest, megjithëse ishte nje yll futbolli që në moshën 15 vjeçare.

Vite më parë, në Ministrinë e Shëndetësisë kisha zyrën përballë një këshilltari të OBSH-së që ishte rumun.

Dr. Havriluk, një personalitet në Rumani, ishte njeri shumë i gjallë dhe me shumë interesa edhe jashtë mjekësisë.

Bisedonim shpesh për letërsinë, kinemanë rumune apo edhe për “karikaturat” e politikës rumune të kohës së Çausheskut që ai i tregonte me shumë art…

Meë përmendte emra rumunesh të mëdhenj me origjinë shqiptare si Dora D’Istrian dhe familjen e saj shumë të famshme Gjika, historianin e madh rumun Nikolla Jorga, aktorin e madh Jon Karamitru (që u bë ministër i Kulturës në vitet 1996 - 2000) apo Viktor Eftimiun, dramaturgun e madh rumun, të lindur në Boboshticë të Korçës... Por vinte veton kur e "ngacmoja" për origjinën e Emineskut.

Kuptohet edhe futbolli kishte vendin e vet në bisedat tona. Një ditë, pasi ishte kthyer nga Rumania, gjatë kafes së mëngjesit më foli për Demollarin… Kishte parë një ndeshje derbi midis Dinamo Bukuresht –Steaau në prill 1993. "Eternul derbi" kishte përfunduar në barazim…

"Demollari po eklipson Dumitraken" (lojtarin më të madh të historisë së Dinamos së Bukureshtit) më thotë.

"Është një fenomen. Po të ishte pak më i ri, patjetër do të ishte në ligat më të mira evropiane."

Më solli edhe një gazetë rumune sportive ku ishte fotoja e Sulës tonë duke shënuar kundër Steaua në tetor 1991, në fitoren e Dinamos 1- 0, si dhe parrullat e tifozërisë së Dinamos: "Demollari omoara militarii" ("Demollari mbyti ushtaret").

Atë sezon (1991-1992) Demollari ishte shënuesi i dytë më i mirë i Kampionatit rumun me 18 gola, pas shokut të tij të skuadrës Gábor Gerstenmájer (rumun me origjine etnike gjermane si ish portieri Helmuth Dukadam).

“Nuk kam parë lojtar të tillë mesfushor në kampionatin rumun, shprehej dr. Havriluk… Është më i mirë se Nikolae Dobrin, më i mirë se Ilie Balaci… Vetëm Hagi është më i madh se Demollari…, por e dua shumë Demollarin… Ai eshte Viktor Eftimiu i futbollit rumun…”