Nga krimi te korrupsioni: Vora, qyteti peng i aferave të Blerim Sherës!

Prej momentit që Blerim Shera u bë kryetar i Bashkisë së Vorës, qyteti dhe banorët u gjendën në një makth të vërtetë. Shera, nje ish-mësues 9-vjecareje, e zëvendësoi profesionin e tij me mjeshtërinë e hajdutërisë, duke e zhytur Bashkinë në borxhe dhe korrupsion galopant.

Një raport i Ministrisë së Financave drejtuar Kryeministrit Rama e identifikoi Bashkinë Vorë si një “gropë të zezë financiare” për shkak të abuzimeve të rënda administrative dhe korrupsionit të Blerim Sherës. Në vitin 2022 shpenzimet e tij tejkaluan me 46% fondin e dhënë nga shteti, ndërsa në vitin 2023 shpenzimet u frynë 59% më tepër se fondi zyrtar. Shera madje përdori edhe paratë e dedikuara për arsimin, shëndetësinë, emergjencat, strehimin dhe çështjet sociale për të financuar aferat e tij korruptive.

Tenderët e Sherës tashmë janë kthyer në histori të zezë. Tenderi famëkeq prej 2.7 milionë Euro për pastrimin e qytetit, të cilit Shera i shtoi edhe 225 mijë Euro të tjera me një urdhër abuziv pa vendim të Këshillit Bashkiak, është vetëm një prej këtyre aferave skandaloze. Mesa duket, SPAK e fali këtë grabitje, por a do zgjohet vallë për skandalin tronditës të fondeve të tërmetit?

Emisioni "Stop" zbuloi nje skandal ku 17 familje të Vorës mbetën në rrugë të madhe, pa shtëpi, pa mbështetje, të sorollatura dhe të braktisura, ndërsa Shera dhe banda e tij përvetësuan fondet e rindërtimit. Dhe ky është vetëm një rast! Një vale denoncimesh të ardhura në Pamfleti tregojnë se viktimat janë me dhjetëra herë më shumë, ndërsa qytetarët e Vorës mbeten peng i lojërave të pista politike e korruptive të kryebashkiakut.Profesor Blerim Shera është i lidhur fort edhe me grupe kriminale në Durrës, Shijak, Fushë-Krujë dhe Tiranë, e deri në Mbretërinë e Bashkuar, ku bashkëpunoi me “çunat e Londrës” të grupit të Qifes për të blerë votat e për të marrë pushtetin. Por çfarë u dha ai në këmbim?

Po ashtu, Shera është i përfshirë edhe në skema mafioze të tjetërsimit të pronave publike dhe private, detaje për të cilat do të flasim në vijim.

Përveç korrupsionit dhe abuzimeve me fondet publike, Blerim Shera ka nisur të investojë shuma të mëdha parash në fushatën e ardhshme. Paratë e grabitura nga fondet e tërmetit, tenderat dhe taksat e qytetarëve po derdhen në pazare politike, një skemë e njohur që ka mbajtur në këmbë klanet mafioze në pushtet.

Koha po mbaron! Njësoj si Besmir Kola në Pezë dhe Xhavit Çeka në Vaqar, edhe Blerim Shera ka zhytur duart në korrupsionin me fondet e tërmetit, por me një ndryshim të madh: shifrat e korrupsionit të Sherës janë shumë herë më tronditëse! Çdo ditë vonesë është bashkëpunim me korrupsionin dhe mafian lokale që ka zaptuar fondet dhe pronat e qytetarëve!