Osmani: Serbia po planifikon sulm hibrid në Kosovë me ndihmën e mercenarëve të Wagner

Presidentja e Kosovës, Vjosa Osmani thotë se paramilitarët serbë po bashkëpunojnë me mercenarët e grupit famëkeq rus Wagner, duke planifikuar një sulm hibrid në Kosovë.

Gjatë një interviste për gazetën britanike “The Telegraph”, Osmani tha se paramilitarët serbë dhe anëtarët e Wagner kanë trafikuar uniforma ushtarake të pashënuara në Kosovë, si pjesë e një operacioni për hedhjen e bazave të një sulmi hibrid nga Serbia me qëllim rrëmbimin e territoreve të Kosovës.

Osmani e krahasoi skenarin që po përgatitet në Kosovë të ngjashëm me atë në Krime të Ukrainës.

“Ata sjellin armë dhe uniforma por nuk janë formalisht pjesë e ushtrisë serbe. Serbia dëshiron të arrijë qëllimet e saj pa u quajtur operacion ushtarak”, tha Osmani.

Presidentja Osmani, pohoi se Beogradi po vazhdon të nxisë tensionet në rajon, në bashkëpunim me Wagner Group të Rusisë, i cili kohët e fundit filloi fushatat për rekrutët serbë për luftën në Ukrainë.

“Strategjia e fshehtë për të kontrabanduar armët për një aneksim të dyshuar është duke u zhvilluar për të paktën gjashtë muaj, tha zonja Osmani. Synimi është pikërisht i njëjtë me atë të përdorur nga Vladimir Putin në Krime nëntë vjet më parë, pohoi ajo.