Mediat në Beograd: Ushtria serbe ka dërguar 6 njësi artilerie me reze të gjatë, 2 km larg…

Mediat serbe raportojnë se gjashtë njësi të artilerisë janë dërguar në kufi me Kosovën, ndërsa tensionet nga pala serbe jo vetëm nuk janë de-eskaluar por duket se po rriten artificialisht dita-ditës.

Sipas gazetës serbe N1, gjashtë njësi model “howitzer”, artileri me reze të gjatë janë dislokuar në kufi me Kosovën, vetëm 2 kilometra nga pika doganore e Jarinjës.

Gjatë mbrëmjes së djeshme dhe ditën e sotme, ka patur incidente të shtuara në Zubin Potok. Ekstremistët serbë që prej ditësh mbajnë të ngritura barrikadat, kanë hapur zjarr ndaj ekipit të KFOR, ndërsa është qëlluar me gurë ndaj makinave të gazetarëve shqiptarë të Kosovës.

Nga incidentet nuk ka patur të lënduar, ndërsa autoritetet janë duke hetuar. Sakaq, kryeministri Albin Kurti është takuar sot me komandantin e KFOR-it, gjeneral major Ferenc Kajari dhe shefin e EULEX-it, Lars Gunnar Ëigemark. Ata kanë deklaruar se asnjë rrugë nuk duhet të qëndrojë e bllokuar me barrikada.