Vinjola Rota, drejtoresha e Arsimit në Korçë që ul pagat e mësuesve dhe bën tendera miliona euro për transport dhe trajnime!

Kjo në foto është drejtoresha e Drejtorisë Rajonale e Arsimit Parauniversitar në Korçë, Vinjola Rota. Një drejtori që fillon në Korçë, vazhdon në Elbasan dhe përfundon në Berat, duke pasur në varësi qindra shkolla në 3 qarqe të mëdha. Një ndarje absurde, ku për një letër një mësues në fshatrat e thella të Skraparit duhet të bëjë mijëra kilometra për të shkuar në DRAP Korçë.

Por, përtej burokracive, ajo që e rëndon më tepër drejtimin e kësaj drejtorie është vetë drejtoresha, Vinjola Rota. Ose vendimmarrja e fundit e kësaj drejtoreshe, e cila gjithmonë e gjen fajtorin gjetkë, siç po tenton që të bëjë edhe në skandalin e fundit. Me një vendim të beftë të DRAP Korçë, qindra mësuesve në Korçë iu është ulur paga deri në 10 mijë lekë.Nga njëra anë kryeministri dhe qeveria e tij trumbetojnë me të madhe rritjen e pagave, duke dalë edhe ballëlartë në komunikime dhe nga ana tjetër vendimmarrja e Rotës, e cila zhbën gjithë këtë propagandë. Duket se Vinjola ka marrë atributet e ministres dhe kryeministrit, teksa këta të fundit ende s’kanë bërë asnjë lëvizje.

Por, nëse Vinjola merr këtë vendim për ulje page në këtë kohë në prag të zgjedhjeve, kujt po i shërben ajo?

Faksimile: Në të njëjtën kohë që uli pagat e mësuesve, drejtoresha e DRAP Korçë hap tendera miliona euro

Duket se, drejtoresha i ka krahët e ngrohta, me lidhjet e saj familjare në Policinë e Korçës apo edhe në organet ligjzbatuese në atë qark. Madje, në kohën kur ajo mori këtë vendim, pa më të voglin hezitim apo frikë ajo hap një supër tender në Agjencinë e Prokurimit Pubik.

Sipas dokumenteve që disponon VoxNews, drejtoresha e DRAP Korçë Vinjola Rota ka shpallur procedurën e shumëpritur të saj “transport mësues dhe nxënës DRAP Korçë të vitit 2025”. Një tender me një fond limit prej 181.401.410 lekë, teksa nëse do t’i shtosh edhe TVSH-në dhe t’a konvertosh në euro, shuma shkon në plot 2.2 milionë euro. Pra, në këto kohëra vëmendja e Rotës është vetëm te ky tender me vlerë të madhe dhe jo te hallet e mijëra mësuesve që ajo menaxhon në 3 qarqe të mëdha.

E themi në këtë kohë, pasi Rota i ka “ndarë” punët, ku në kohën e qershorit, korrikut dhe gushtit merret me emërimet e mësuesve, ku “kandidatët” duhet të paraqiten te disa persona të autorizuar prej saj për t’u emëruar apo transferuar. Në periudhën e shtatorit dhe tetorit Rota merret me emërimet e psikologëve, duke e kthyer në një “biznes” të mirëfilltë, pasi ajo shumicën i emëron sipas preferencave, duke bërë edhe provime formale dhe me dyshime të forta se janë të paracaktuar (më vonë do merremi me këto provime).

Dhe vijmë në kohën e tanishme, shkurt e mars, ku ajo merret me organizimin e tenderëve ku vëmendja është te përzgjedhja e firmave që bëjnë transportin, në të tria qarqet.

Faksimile: Njoftimi i DRAP Korçë për zhvillimin e tenderit për trajnimin e drejtuesve

Por, nuk përfundojnë këtu dyshimet për abuzim nga DRAP Korçë, ku Vinjola Rota e ka kthyer totalisht në funksion të saj. Për vite me radhë, ajo ka hapur edhe tendera për trajnime për drejtuesit dhe mësuesit.

Sipas burimeve të VoxNews, procedurat bëhen formale dhe janë një shpenzim i kotë i parave. Edhe në vitin 2025, sipas dokumenteve që disponon redaksia jonë, ajo ka parashikuar të bëjë tenderin “trajnime për drejtuesit dhe mësuesit e IAP-ve të DRAP Korçe”. Fondi është plot 100 mijë euro.

Ku i gjen gjithë këto para DRAP Korçë për trajnime? A janë realizuar dhe për çfarë shërbejnë?

Jo vetëm trajnime, por drejtoresha Rota ka harxhuar edhe 1 milionë lekë për të spërkatur zyrën e saj nga mushkonjat dhe brejtësit. Të jetë kaq e rëndësishme?!